رسالة الى ......

ــــــــــــــــــــــــــــــــــــــ

بعد التحية والسلام

أفكرك ياصحبى بأول ما كان بينا من كلام ، يوم ما قلت نفسى أشوفك حتى لو من غير كلام ولا سلام

قلتلك ليه اللقا ، قلتىلى متسأليش متفكريش ، لازم الحب من غيره الدنيا متسويش  ، لازم الأمل علشان نعيش ، وافقى بقى متكسفنيش .

و اتكرر ياصاحبى اللقا ،

 وصدقتك لما قلتلى : أنا بحبك من زمن و أنتى متعرفيش ، عينى عليكى صبح و مسا ، و بانادى عليكى و أنتى كأنك مبتسمعيش ، لكن ربى استجاب دعايا و جمعنا فى لحظة متتنسيش ،

و عشنا أيام  الضحكة فيها من القلب  ، والبسمة بينا تنقسم ، و الفرحة تتلبس ثوب أبيض يلون عمرنا .. يا فرحنا ، يافرحة الدنيا بحبنا .

و مرت الأيام ،و اللى جرا أكبر من أى كلام

أفكر ك  ياصاحبى لما جريت عليها كإنها منقذك من حبى ليك ، و كأن حبنا كان حلم وانتهى لما الغطا اتشال من عليك .و عشت انا أحزانى وحدى رغم ألمى و شوقى ليك .

و مرت الأيام و لقيتنى بسأل عليك

 فرحونى لما قالولى انها طارت لغيرك ، وهى لسه بين ايديك ، الحقيقة فرحت ليا و فرحت فيك ، أصل أنا كنت عارفه انه كله سلف و دين ، و مش مهم أمتى و أزاى و فين ، هو ده عدل الرحمن الرحيم ربى و ربك ورب العالمين .

                            ـــــــــــــــــــــــــــــــــــــــــــــــ